Yama GRATIS durante dia, anochi i pa destinashonnan internashonal

DIGICEL TA ANUNSIA TREMENDO KAMPAÑA “TALK FOR FREE” KU DIGICEL

WILLEMSTAD, Kòrsou - 21 di aprel 2011: Digicel, e ret di mas grandi i mihó di Boneiru i henter e region Karibense a lansa su kampaña ‘TALK FOR FREE’. Ta trata aki di un kampaña úniko i inigualabel den kual klientenan di Digicel lo por hasi yamadanan grátis. Hasiendo uzo di e kampaña, klientenan di Digicel por papia GRATIS durante dia, durante anochi i hasta sierto destinashonnan den eksterior.

“Ta e deseo di tur kliente pa por papia mas na selular ku famia i ku amigunan sin ku mester preokupá si e yamada ta bai kosta muchu karu. Mayoria kliente lo preferá ku e yamadanan aki ta grátis!”, asina Lisa Canhigh di e departamentu di merkadeo di Digicel Boneiru a duna di konosé durante un konferensiá di prensa tene na Little Souk.

Philip van Dalsen, Regional CEO di Digicel Dutch Caribbean, Suriname i Guyana a sigurá ku e kompania ta skucha deseo di nan klientenan i p’esei mes ku e promoshon úniko aki di Talk for Free, ta kontesta e petishon di tur su klientenan. Spesialmente pa e kampaña aki a lansa e “Digicel Genie” ku ta kumpli ku e tres deseonan di tur su klientenan. E tres deseonan aki ta pa por hasi yamadanan grátis, tantu lokal komo internashonal i durante oranan di anochi. “I mi por sigurá Boso ku esakinan no ta storia”, segun Philip van Dalsen. E “Digicel Genie” lo wordu usa komo kara di e promoshon spesial aki. Despues Philip van Dalsen a duna un splikashon amplio riba kon e kampaña aki ta hinka den otro i kon klientenan di Digicel lo por partisipá.

Ku e promoshon “Talk for Free lokal”, e kliente ta paga pa e promé 3 minütnan i e 30 minütnan despues ta grátis, riba e mesun yamada. E oferta aki ta bálido solamente riba yamadanan hasi di un Digicel prepago pa otro selularnan Digicel aki na Boneiru.

Tambe klientenan lo por probechá di e promoshon “Talk for Free Nights” i yama grátis henter anochi, entre 10:00PM i 5:59AM. E úniko kos ku e kliente mester hasi ta dos yamada lokal Digicel pa Digicel den dia entre e orarionan di 6:00AM pa 9:59PM i papia un mínimo di 3 minüt. E promoshon aki ta bálido solamente for di un selular Digicel prepago pa un otro selular di Digicel.

“Talk for Free International”. Klientenan di Digicel por probechá di e kampaña úniko aki pa hasi yamadanan grátis pa destinashonnan popular den eksterior ku e promoshon “Talk for Free International”. Awor ku Digicel bo por hasi un yamada internashonal, papia 3 minüt i bo ta risibí e siguiente 15 minütnan GRATIS riba e mesun yamada. Oferta ta bálido pa e klientenan prepago di Digicel ku ta hasi un yamada pa un di e destinashonnan menshoná: Colombia, Venezuela, Merka, Haiti, Hulanda, Repúblika Dominikana, Aruba, Jamaica, Sürnam, Perú, China, India i Kòrsou.