Pa brinda nan klientenan di Kòrsou i Boneiru  un mihó servisio

DIGICEL TA BINI KU UN RET NOBO DI 4G

Ku ta duna mas velosidat i kapasidat di data riba selular

WILLEMSTAD/KRALENDIJK - 21 di yüni 2011: Digicel semper ta buska pa brinda su klientenan un mihó servisio, i manera nos klientenan mes por a ripara kaba nos ta trahando duru pa aktualisá nos ret pa un teknologia mas nobo na Kòrsou i Boneiru. E teknologia aki ta un generashon nobo den  komunikashon mobil. Digicel ta den e fase final pa asina por ofresé nan klientenan e  teknologia di  4G pa Kòrsou ku Boneiru. , asina Philip van Dalsen, CEO Regional di Digicel Group  a anunsiá. Dor di e proseso di aktualisashon i kambio, ta kousa ku téknikonan konstantemente mester hasi pruebanan entre e ret aktual i esun nobo. Ta durante e tèstnan aki tin biaha klientenan ta eksperiensha ku e komunikashon ta diferente ku normal. "Nos ta pidi nos sinsero diskulpa na nos klientenan, pero nos ta  sigurá ku nos ta den e fase final i ku pronto nan por disfrutá di e teknologia nobo aki", segun van Dalsen a bisa.

Digicel a sigui progresá i a krese enormemente den kantidat di klientenan na Kòrsou i Boneiru, tantu den su klientenan prepago komo tambe esunnan postpago. Ku e kresementu aki den mente, Digicel konosí pa su ret mas grandi i mihó, a lansa un par di aña pasa e ret nobo di generashon 2G, konosí komo EDGE. Pero ku e demanda haltu pa mas i mihó servisio ku nos tin na Kòrsou i Boneiru, a hasi ku e kompania a opta pa hasi un invershon multi mionario pa bin ku un ret nobo, konosí komo e di kuater generashon den teknologia di komunikashon mobil, yama internashonalmente komo e teknologia "4G".

Téknikonan di Digicel mes, inkluyendo ekspertonan di e kompania internashonal konosí "Ericsson", ta na nos isla pa instalá e ret nobo ku mester traha awor simultáneamente banda di e ret aktual di e kompania ku a trese revolushon den komunikashon di selular riba nos isla. E trabounan ta avansando, pero ta rekerí algun prueba mas promé ku por pasa tur nan míles di klientenan for di un ret pa e otro.

Digicel ta kere ku, manera e trabounan ta avansando, ku den algun siman mas nos lo por lansa nan ret 4G den forma ofisial na nos klientenan. Promé ku esei, lo sigui hasi e pruebanan nesesario pa sigurá ku asina nan lansa e servisio nobo i moderno aki, ku e ta traha 100% pa tur kliente. Ku e avansenan teknológiko den mente, Digicel komo e operador di komunikashon mobil ku mas ta kresiendo den Caribe, Sentro Amérika i Oséano Pasífiko, ta konvensí ku e merkadonan lokal lo sirbi komo un berdadero ehèmpel di inovashon pa otronan.

FIN