Den pleno preparashon pa un soño Olímpiko

DIGICEL TA LANSA KAMPAÑA PA ATLETANAN SPESIAL PARTISIPA NA WEGANAN OLIMPIKO

Komunidat di Kòrsou tambe por kontribuí

WILLEMSTAD, Kòrsou – 7 di febrüari 2011: Nos atletanan di Olimpiada Special, ta den nan pleno preparashon pa nan partisipashon den e Weganan Olímpiko na Gresia ku lo tuma lugá den luna di yüni di e aña aki. E atletanan i e organisashon di Spesial Olympics manera kustumbrá por konta ku gran sosten di Digicel pe semper yega na nan metanan. Pa e motibu aki, Digicel, fuera di nan donashon di tur aña, a lansa un kampaña di SMS pa rekoudá mas fondo pa nan biahe dunando chèns na nos komunidat pa tambe hasi un aporte.

Pa lansa e kampaña aki, Digicel a invitá e atletanan huntu ku e organisashon di Special Olympics pa un enkuentro sosial kaminda Digicel a duna un splikashon amplio di e kampaña i alabes a hasi entrega di un sportbag pa asina e atletanan por entrená pa nan ta bon prepará pa Gresia.

Pa kontribuí na nos atletanan, klientenan di Digicel por manda un SMS ku e palabra GREECE pa e number 2011. Kada SMS ta kosta Naf. 1,- i tur entrada ta dediká na Spesial Olympics.

Tambe por yuda Special Olympics dor di atendé nan Movie Night dia 17 di febrüari 2011, ku lo tuma lugá na Cinemas Curacao ku e pelíkula titulá: The King Speech, ku aktuashon di Colin Firth. A presentá e pelíkula aki pa tantu nominashon komo premiashon. Preis pa karchi ta Naf. 50,- pa persona i ta inkluí un limonada i popcorn grátis i tambe lo rifa diferente premio na porta.