DIGICEL TA PIDI KLIENTENAN DISKULPA PA E SERVISIO POBER KU NAN TA EXPERIENSHA

Ku e promesa pa mehorá  e servisio pa rekobrá e konfiansa bek di su klientenan

WILLEMSTAD/ KRALENDIJK, - 27 di òktober 2011: Awe Digicel ta pidi un diskulpa sinsero na su klientenan na Kòrsou i Boneiru, pa e servisio pober ku nan a eksperiensha durante e último lunanan i ku un promesa serio di hasi tur loke  ta na nan alkanse pa rekobrá e konfiansa bek di su klientenan.

Den e luna di Yüli ku a pasa, Digicel a lansa su servisio 4G na Kòrsou i Boneiru ku un promesa pa brinda un eksperiensha fantástiko di selular basa riba un akseso super lihé - pero un akumulashon  di problema tékniko a resultá den un eksperiensha di uzo defisiente i ku komo resultado klientenan frustrá.

Pa koregí i regla e kousanan di e problemanan di e servisio, Digicel a perkurá pa  hasi un análisis di su ret kompletu  i  a identifiká un kantidat di problema, entre otro fayonan den "hardware" i "software", "bugs" riba e  ret, problema ku nan partner den teknologia i tambe a deskubrí un konfigurashon inkorekto riba e  ret. Tur esaki huntu a resultá den un ret ku no ta kuadra ku e propósito i den un servisio pober na su klientenan. A señalá tur e problemanan aki i ta ya nos ta mira  mehorashon riba nos ret.

Philip van Dalsen, CEO regional Digicel Dutch Caribbean, Suriname i Guyana  a komentá: “Semper na momentu di lansa un teknologia nobo i inovativo, ta presentá ku su retonan i ademas nos a eksperiensha problema ku nos partner den teknologia - ku nos no por uza komo un motibu. Nos tabatin un kantidat di problema riba tur nivel ku e servisio ku nos ta ofresé i esei no ta bon sufisiente. Nos sa kon frustrante e ta pa tin un servisio ku no ta traha manera  debe ser - i nos sa ku ora kos bai malu -  e klientenan mester tende di nos i keda informá. Nos ta asumí nos responsabilidat. Simplemente, nos no ta brindando loke nos a primintí i nos no a komuniká ku nos klientenan di un manera efektivo  na  e momento ku e problema a presentá. ".

Despues  Philip van Dalsen, e CEO Regional di Digicel Dutch Caribbean, Suriname i Guyana a sigui bisa: "Na Digicel nos kier e mihó pa nos klientenan - i nos ta sinti nos sumamente malu di a defroudá nos klientenan kompletamente. Nan meresé mihó i nos ta bai mehorá! Nos sa ku pa gana nan konfiansa bek no ta algu ku ta sosodé di un dia pa otro - pero nos kier sigurá nan ku nos lo drecha esaki - i nos lo brinda nan e mihó eksperiensha di selular posibel.”

Pa mas informashon por tuma kontakto grátis ku nos servisio na kliente na 145 for di bo selular.

 Tokante Digicel Group

Despues di dies aña di operashon, Digicel Group Limited tin 11.5 mion kliente alrededor di su 32 merkadonan den Karibe, Sentro Amérika i Osean Pasífiko. E kompania tin e reputashon di brinda e mihó kalidat, mihó servisio i mihó ret.

Digicel ta e spònser prinsipal di e ekiponan deportivo di Karibe, Sentro Amérika i Osean Pasífiko, inkluyendo e ekipo di Special Olympics den e regionnan aki. Digicel ta spònser e ekipo di cricket di west indies i tambe tin e titulo di spònser e Digicel Caribbean Cup. Den pasífiko, Digicel ta e spònser orguyoso di diferente ekipo nashonal di rugby i tambe ta spònser e ekipo di vanuatu cricket.

Digicel tambe ta protagonista di e inisiativanan basa riba komunidat alrededor di su merkadonan i a lanta Digicel Foundation na Jamaica, Haiti i Papua New Guinea ku ta enfoká riba e desaroyo di e programanan edukashonal, kultural i sosial.

Na aña 2004, Digicel a desaroyá Digicel Rising Stars – un evento anual di show di talento pa sostené e artistanan hóben den músika den Karibe. E show a krusa Karibe, Haiti, Jamaica i Trinidad & Tobago klasifikando komo un di e top-rated show.

Digicel ta inkorporá na Bermuda i su merkadonan ta konsistí di: Anguilla, Antigua & Barbuda, Aruba, Barbados, Bermuda, Boneiru, British Virgin Islands, Cayman Islands, Kòrsou, Dominica, El Salvador, Fiji, French Guiana, Grenada, Guadeloupe, Guyana, Haiti, Honduras, Jamaica, Martinique, Nauru, Panamá, Papua New Guinea, Samoa, St Kitts & Nevis, St. Lucia, St. Vincent & The Grenadines, Sürnam, Tonga, Trinidad & Tobago, Turks & Caicos i Vanuatu. Digicel tambe tin kobertura Na St. Maarten i St. Barts den Karibe.

Bishita www.digicelgroup.com pa mas informashon.

FIN