WILLEMSTAD, Kòrsou - 7 di novèmber 2010: Siendo un kompania ku semper ta kla pa yuda den momentonan di krísis, Digicel ayera a hasi un donashon di no ménos ku 100 mil florin na Curacao Media Help, sostene pa Reda Sosial, durante e téletòn organisá pa yuda e damnifikadonan di e tormenta tropikal Tomas. Manera ta konosí, un kantidat di kas i negoshinan a risibí daño enorme dor di áwaseru pisa ku a kai siman pasa na nos pais. Digicel, meskos ku e ta hasi semper den tur pais den kual e ta operá, mesora a sali pa yuda tur esunnan afektá. Gobièrnu di Kòrsou a lanta un fundashon den kual un i tur por hasi donashon pa yuda e damnifikadonan. Digicel ta konsiente di su ròl komo bon siudadano korporativo di Kòrsou i tambe a aportá ku e suma grandi aki. Di e forma aki Digicel ta konvensí, via Curacao Media Help, ku e fondonan ku e ta pone disponibel lo sa di yega na esunnan den mas nesesidat. Na okashon di entrega di e donashon den studio di TeleCuracao Hans Lute, CEO di Digicel Dutch Caribbean, a hasi un apelashon na un i tur i en espesial kompanianan ku no a hasi un donashon ainda, pa hasi esaki pa asina mas hende por wòrdu yuda.