WILLEMSTAD.- E landadó Adrian Hoek di e ekipo Bulado a keda premiá komo e “Deportista di Luna” di parti di un komishon konsistiendo di periodista- i reporteronan deportivo di medionan di komunikashon sosial.

Djasabra último e anunsio i premiashon a tuma lugá na Amerikan Café & Sportbar, situá den Mortierswega na Amerikanenkamp.

Ademas di Adrian Hoek, tambe a premia e dos otro nominadonan, Gernailys Zimmerman (Biar, Ekipo Boca Stars) i e  ekipo di futbòl Hubentut Fortuna komo e atletanan/ekipo ku mas a destaká den luna di Yüni.

Adrian Hoek a hiba palabra gradisiendo e komishon pa e premionan risibí i a komprometé su mes pa keda hasi su máksimo esfuerso den su estudio i tambe e deporte ku e ta praktiká ku ta natashon.

Tur tres nominado a risibí un sertifikado den leshi, opsekio di Angelo Reenis. Tambe tur tres a risibí un  bunita medaya di Salas Sport Shop, ademas di un pèchi. Otro premionan pa e ganadó: Un daypass di Breezes, giftcheque di Fl. 150,-- di Changes/Diorca, un telefon i karchi di 100 florin opsekio di Digicel un giftcard di 300 florin di MCB tambe e ganador por saka un potrèt kompletamente grátis na Studio Kort i e lo por pela un luna kompletamente grátis na Strak Strak Barber shop & Kapsalon.

Pa e dos otro nominadonan: Karchi di telefon di 50 florin opsekio di Digicel, giftcheque di Fl. 100,-- di Sedreko, un nominado un giftcard di Fl. 100,-- di DIORCA, i otro e otro nominado un giftcard di Fl. 100,-- di Petro Industrial.

Allstar Embroidery a enkargá su mes pa miembronan dje komishon ta uniformá, miéntras ku Amerikan Café & Sportbar manera ta kustumber a pone su lokalidat na disposishon pa e premiashon por tuma lugá den un ambiente super dushi, liber di alkohòl i liber di humamentu.