AUDY MULLER, DEPORTISTA DI LUNA DI YANUARI 2011

 WILLEMSTAD.- E atleta di taekwondo Audy Muller a keda premiá komo e promé “Deportista di Luna” di parti di un komishon konsistiendo di periodista- i reporteronan deportivo di medionan di komunikashon sosial.

Djasabra último e anunsio i premiashon a tuma lugá na  Amerikan Café & Sportbar, situá den Mortierswega na Amerikanenkamp.

Ademas di Audy Muller, tambe a premia e dos otro nominadonan, Chade Nersicio (natashon) i Ramiro Griffith (futbòl).

E idea pa premia un deportista di luna na un promé instante a keda diskutí den un grupo di sinku pa seis persona, pero hopi lihé a krese i awor ta konta ku un komishon di 18 persona ku tur luna lo traha pa nominá i premia esnan ku ta meresé.

Remarkabel ta e reakshon di parti di komersio ku a brasa e idea aki.

Tur tres nominado a risibí un sertifikado den leshi, opsekio di Angelo Reenis. Tambe tur tres a risibí un  bunita medaya di Salas Sport Shop, ademas di un sèrbètè.

Otro premionan pa e ganadó: Un daypass di Breezes, giftcheque di Fl. 150,-- di Changes, un telefon i karchi di 100 florin opsekio di Digicel i giftcard di 300 florin di MCB.

Pa e dos otro nominadonan: Karchi di telefon di 50 florin di Digicel, giftcheque di Fl. 100,-- di Sedreko, giftcard di Fl. 100,-- di DIORCA, otro giftcard di Fl. 100,-- di Petro Industrial.

Strak Strak Barbershop & Kapsalon a regalá e ganador un drecha di kabei pa henter e luna di febrüari, i tambe foto studio Kort a regalá Audy Muller e posibilidat pa saka un potrèt kompletamente grátis.