EKIPO DI FUTBOL NASHONAL TA KLA PA BATAYA DEN DIGICEL CARIBBEAN CUP

WILLEMSTAD, Kòrsou, 8 di òktober 2010 – Ta algun siman kaba ku e ekipo nashonal ta den training pisá pa asina por ta prepará pa e promé weganan di Digicel Caribbean Cup na Sürnam dia 13 di òktober próksimo. Durante di un di e trainingnan di e selekshon nashonal di e siman aki na SDK, e representante di merkadeo di Digicel Kòrsou, Lisa Canhigh, a bishita e ekipo nashonal pa deseá nan tur klase di éksito i alabes a hasi entrega di un regalo na kada un di nan.

Kòrsou a bin ta partisipando den e kampeonato Karibense di futbòl for di algun aña pasa kaba. Por menshoná ku durante e promé edishon di Shell Caribbean Cup na aña 1989, e ekipo nashonal di Kòrsou a sali na di tres lugá. E tempu ei e weganan final a tuma lugá na Barbados i e pueblo di Kòrsou tabata den gara di futbòl.

Na inisio di e training, Sr. Henry Caldera a ekspresá nan determinashon pa bai ku e puesto di kampion e aña aki i tambe na su turno a enfatisá ku e entusiasmo bou di e hungadónan ta hopi haltu. Komo tal tur e hungadónan ta train masha duru i ta atendé na e trainingnan sin falta.

Digicel un biaha mas ta deseá henter e delegashon di nos ekipo nashonal tur klase di éksito i un bon biahe dia 10 di òktober próksimo.

FIN